Plantun de Prouvènço

Pèr coumpara dos planto d'encò nostre

Moehringia pentandra & Ononis spinosa subsp. antiquorum

Moehringia pentandra

Caryophyllaceae

Nom en français : Sabline à cinq étamines.

Descripcioun :
Aquesto lineto, pulèu raro, trachis dins lis esboudèu, li sablo e sus li cengle. Coume tóuti li meno dóu gènre Moehringia, s'atrobo un meno de biasso pèr li fournigo sus la grano que l'emporton pèr nourri si babo, l'elaiosome (vèire la fotò à man drecho). Li fueio soun larjo e pecouiado emé quàsi ges de péu (aleva sus lou pecou). Se recounèis tambèn à si grano picoutado. Apoundèn que souvènti fes i'a ges de petalo.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 5 à 20 cm
Fueio : óupousado
Tipe bioulougico : Teroufite
Cicle bioulougico : Planto de l'an

Gènre : Moehringia
Famiho : Caryophyllaceae

Ordre : Caryophyllales

Coulour de la flour : Blanco
Petalo : 5
Ø (o loungour) flour : 1,5 à 2 mm
Flourido : Printèms

Sòu : Ca (Si)
Autour basso e auto : 0 à 1200 m
Aparado : Noun
Abriéu à jun

Liò : Esboudèu - Cengle - Sablo - Bos clar
Estànci : Mesoumediterran à Subremediterran
Couroulougi : Eurimediterrano
Ref. sc. : Moehringia pentandra J.Gay, 1832 (= Moehringia trinervia subsp. pentandra (J.Gay) Nyman, 1878 )

Estanco-biòu

Ononis spinosa subsp. antiquorum

Fabaceae Leguminosae

Àutri noum : Tanco-biòu, Restanco-biòu, Avagoun, Ajagoun, Lènte.

Noms en français : Bugrane épineuse, Bugrane des anciens.

Descripcioun :
Aquesto planto pulèu bèn couneigudo, trachis dins la garrigo, tepiero seco e ermas. Dins li champ, emé sa forto racino fasié tanca l'arraire adounc li biòu, d'ounte lou noum; la subsp. presentado eici, dóu miejour de Prouvènço, èi di proun espinouso.

Usanço :
L'estanco-biòu èi couneigu desempièi li gre (Galien) pèr faire parti li graviho dóu ren ; defèt, la racino èi proun diuretico (mai sènt proun marrit). La planto èi vertuouso tambèn contro lou ràumi de pèu (eczema) bonodi si prouprieta anti-enflamativo. Èi peréu anti-bateriano (gagarisme pèr lou mau de gorjo), lucho contro li champignoun e mai enca.